Fyrsta sýning haustsins gekk mjög vel!

Það er óhætt að segja að fyrsta sýning haustsins á Abbababb! hafi gengið frábærlega.  Sjálfstraustið mikið með Grímu fyrir Barnasýningu ársins í farteskinu síðan í sumar!  Nýja fólkið, Tinna Hrafns og Jóhannes Haukur, fóru á kostum og heilluðu áhorfendur.  Við vorum mjög glöð með áhorfendur okkar, en í þeim hópi voru t.d. Þorgerður Katrín Menntamálaráðherra og Rúnar Freyr leikari og leikstjóri.  Edda Þórarins, stórleikkona, var að koma í annað skipti!  Eitt barnið kallaði stöðugt á mig á meðan sýningunni stóð (Felix!  Felix!  Felix!) en ég varð að láta sem ekkert væri þangað til við komum í framkallið.  Þá gat ég heilsað upp á þennan nýja vin minn   Börn eru dásamleg og það er svo gaman að sjá hvað þau skemmta sér á Abbababb!  Einn hló allan tímann í Prumpulaginu.  Hafði aldrei, fyrr eða síðar, skemmt sér svona vel.  Á sýningunni voru líka tveir sem voru ekki orðnir tveggja ára.  Báðir voru heillaðir og sátu eins og ljós og fylgdust með.

Nú situr Sigtryggur Baldursson sveittur við og undirbýr sig fyrir að koma inn í sýninguna sem Hr. Rokk.  Hans frumsýning verður 23. september.  Alveg ástæða til að halda eitt frumsýningarpartýið enn!  Dóttir Sigtryggs kom með honum á sýninguna um daginn.  Hún lýsti því yfir við mig að hún ætlaði að verða leikkona og leika í Abbababb! þegar hún yrði stór!  Ekki er ráð nema í tíma sé tekið...

Næsta sýning er á sunnudaginn kl. 14.  Miðasala á www.midi.is eða í síma 555 2222.  Drífið ykkur endilega að panta miða elsku vinir, sýningar verða ekki margar á haustinu.

Kær kveðja úr rigningunni á Starhaganum, Felix

Barnasýning ársins 2007 kemur aftur!!

Leikhópurinn Á senunni og Hafnarfjarðarleikhúsið Barnasýning ársins 2007 kemur aftur!! Abbababb! eftir Dr. Gunna  

Leikhópurinn Á senunni og Hafnarfjarðarleikhúsið tilkynna með stolti að  fjölskyldusöngleikurinn Abbababb! eftir Dr. Gunna í leikstjórn Maríu Reyndal kemur aftur í Hafnarfjarðarleikhúsið í september.   Fyrsta sýning á haustinu var sunnudaginn 9. september kl. 14.00.  Aðeins verða örfáar sýningar á haustinu!

 

Abbababb! var frumsýnt í Hafnarfjarðarleikhúsinu sunnudaginn 11. febrúar við gríðarleg fagnaðarlæti frumsýningargesta og frábæra dóma gagnrýnenda og gekk fyrir fullu húsi fram á vorið.  Nú í júní hlaut svo sýningin Grímuna, íslensku leiklistarverðlaunin, sem besta barnasýningin árið 2007.  Þá var Lára Stefánsdóttir tilnefnd til Grímunnar fyrir dansana í verkinu. 

 

Söngleikurinn Abbababb! byggir á frábærri barnaplötu Gunnars Lárusar Hjálmarssonar, Dr. Gunna, sem kom út árið 1997 og seldist í þúsundum eintaka.  Meðal þekktustu laga eru Prumpulagið, Systa sjóræningi, Herra Rokk og fýlustrákurinn og Rauða hauskúpan.  Abbababb! gerist í lok sumars, einhverntímann í kringum 1975, á þeim tíma er börn léku sér úti og það að hoppa í polli var alveg á við nýjasta tölvuleikinn í dag.  Aðalkarakterarnir eru börnin í leynifélaginu Rauðu hauskúpunni, en þau eiga sér þann draum að komast á forsíðu Moggans fyrir að koma upp um hrikalega glæpi.  Stóra ógnin í lífi barnanna eru “stóru strákarnir” en þeir eru slánar sem hangsa, hlusta á diskó og eru öllum til ama.  Þegar dínamít fer að hverfa úr vinnuskúrum í nágrenninu fara dularfullir hlutir að gerast og æsispennandi atburðarrás fer í gang.  Þá reynir á Rauðu hauskúpuna, Herra Rokk og vini þeirra í hverfinu...  Nánari upplýsingar og myndir má finna á www.abbababb.is  

 

Þess má geta að tónlistin úr sýningunni er líka komin út á geislaplötu, sem hefur fengið frábæra dóma í Mogganum og Fréttablaðinu.  Útgefandi plötunnar eru Sögur ehf (www.baekur.is)   Sagan er líka að koma út á bók.  Útgefandi er Veröld (www.verold.is)

 

Nokkrar breytingar verða á leikhópnum í haust.  Álfrún Helga Örnólfsdóttir fer í barneignafrí og í hennar stað kemur Tinna Hrafnsdóttir.  Þá þarf Atli Þór Albertsson að fara í aðgerð á hné og í hans stað kemur inn í sýninguna í 2 mánuði Jóhannes Haukur Jóhannesson.  Einnig mun Felix Bergsson fara áfram með hlutverk Hr. Rokk í stað Sigurjóns Kjartanssonar en síðar í september tekur Sigtryggur Baldursson við hlutverkinu.

Hægt er að kaupa miða á www.midi.is og einnig í síma 555 2222 hjá Hafnarfjarðarleikhúsinu.

 

Til að gefa þeim sem ekki hafa upplifað sýninguna, látum við fylgja nokkur ummæli áhorfenda og gagnrýnenda.

                 “Hljómsveitin er þétt og skemmtileg og söngur kraftmikill.. ekki veikur hlekkur þar..”                “Dansar Láru Stefánsdóttur eru bráðskemmtilegir..”                “Abbababb! er fjörug stuðsýning sem ætti að kæta bæði börn og fullorðna..” ÞT, Mbl.“Ég á bara til eitt orð: VÁ. Til hamingju með þetta, sýningin er snilld frá A-Ö. Ég held að ég hafi sjaldan hlegið jafn innilega á leiksýningu- og þetta er BARNALEIKRIT! Börnin mín tala ekki um annað og ótrúlega fyndið hvernig þau tala um karakterana eins og þau hafi þekkt þau í mörg ár..”  Berglind Ósk, hamingjusamur gestur“Abbababb! fær 3 Beinteina og sex stafi úr Beinteinn.  Næstum fullt hús.  Varla hægt að gera skemmtilegri barnasýningu!”  (Mest hægt að fá 4 Beinteina)“í salnum voru börn frá þriggja ára aldri og mér sýndist allir skemmta sér konunglega..”“Ég skora á ykkur öll að kíkja á Abbababb!”  AB, Vitinn, RÚV“...bottom lænið: mér fannst bara svo gaman! og krökkunum sem voru með mér fannst ógeðslega gaman. og maður verður svo glaður þegar börnunum manns finnst gaman í leikhúsinu..”  Víkingur, hamingjusamur bloggari“Þannig er tónlistin úr söngleiknum Abbababb! afbragð, hún er skemmtilega framreidd og ber náðargáfu höfundar – eins og forverinn – fagurt vitni.”  AET, Morgunblaðið “..sex ára fylgdarmaður minn tilkynnti í hléinu að hann hefði hug á því að sjá þessa sýningu þúsund sinnum. Betri verða meðmælin varla.”“Það er óhætt að mæla með þessari sýningu fyrir börn og fullorðna.”  ÞS, Víðsjá RÚV“Takk fyrir skemmtunina! Við sátum fjórar á sýningunni;  á aldrinum 3ja, 5, 10 og 60 og skemmtum okkur allar drotningarlega”  Áslaug, hamingjusamur gestur  Ástin er rokk og ról!!